كفايه تمثيل إنك عايش
كفايه تمثيل إنك على حق

موت وإندفن أحسن
خليها بإيدك لا بيد عمرو
أهى أى دفنه فى أى قبر

فى بلدك مفهوم واحد أكيد
ماشى على كل الخلايق و فارد
مَثل تعيش إفهم تضيع
تخسر أكيد لوتسأل
تضيع أكيد لو تفهم
هى كده من غير سؤالات
ولا فهم و لا حوارات
حمار تعيش... فلحوس تضيع

بلد عجب
فيها الهايص هايص
واللايص تعب
يمينك ناس مش مهتمين
شمالك ناس تعبانين
فى الهم مطحونين
تبص شمالك و تسأل إيه السبب
يقولوا من غير رد،
إسأل عيونوا الحزنانين
إسأل قلوبنا المجروحين
إسأل عيالنا الجعانين
بص فى عيونهم المحرومين
البصاصين على غيرهم حاقدين
و100 ألف ليه و ليه
تسبقهم فى عيونهم قبل لسنتهم

وأرجع و بص يمينك
ع اللى مش مهتمين
فلوسهم فى جيوبهم مرتاحين
أكلين، شربين
فى الخلق الغلابة نطاحين
والكل عندهم عبيد
والمستوى أقل و قليل
مجنون مين اللى يرفع صوته
ولاعينه
لا يمد الا يد
مجنون مين اللى يطلب
ولو القليل
مهلباتيه و عواتيه
ضد الريح لأ..
و فوق الريح

الله يكون فى عونا
ملناش غيره هو
خالق الخلق الكريم.

كلام ، كلام ، كلام
ما بإيدى شيىء غير الكلام
شايف الهجص و التهليب يمين و شمال
وما قدر أعترض إلا بكلام

إمتى الكلام يطلع و يقف قصاد الفساد
يقضى الفساد عليا ولا أنا اللى اقضى ع الفساد
مليت سكوتى قصاد الغلط
مليت و نفسى أبطل كلام.